Xabarin’iz bar, 2022-jil 16-mart ku’ni Prezidentimiz Saliq komitetine barip, salıq sho’lkemleri xizmetkerleri menen ushirasiw waqtinda isbilermenler menen ushirasip, olardin’ ma’selelerin u’yrenip, saliq nizamshilig’indag’i o’zgerisler boyinsha tu’sindiriwler alip barip, za’ru’r tapsirmalar bergen edi.
Bu’gingi ku’nde de “Saliqshi – isbilermenge ja’rdemshi” principi tiykarinda Qanliko’l rayoni saliq xizmeti sho’lkemleri ta’repinen isbilermenler aldina barg’an halda olardin’ ma’selelerin u’yrenip, ko’shpeli saliq ma’sla’ha’tleri ko’rsetilip atir.
Saliq komitetinin’ 2021-jil 11-yanvar ku’ngi “Saliqshi-isbilermenge ko’mekshi” principi tiykarinda isbilermenlerdi qollap-quwatlaw boyinsha a’melge asiriliwi lazim bolg’an “Ha’reketler rejesi”n tastiyiqlaw haqqindag’i 10-sanli buyrig’i qabil etildi.
Usi buyriqqa tiykarlanip ko’meklesiw za’ru’r bolg’an isbilermenlik subyektlerinin’ dizimi islep shig’ilip, bul toparg’a:
– tazadan ashilg’an subektler;
– esabat usinbag’anlar;
– “Nol” esabat using’anlar;
– to’lem a’melge asirmag’anlar;
– is haqi esaplamag’anlar;
– bank aylanisin a’melge asirmag’anlar;
– saliq uyimlarina bir neshe ma’rte mu’rajat etken saliq to’lewshiler kiritildi.
Usi ko’mekke za’ru’r bolg’an toparg’a kiritilgen isbilermenlik subyektlerinin’ mashqalalarin u’yreniw ha’mde olarg’a ja’rdem beriw barisinda saliq organlari ta’repinen tiyisli ilajlar alip barilmaqta.
Atap aytqanda, Qanliko’l rayoni Saliq inspekciyasi ta’repinen 2023-jildin’ fevral ayi dawaminda 29 isbilermenler menen ushirasiwlar o’tkerdik ha’m ko’meklesiw za’ru’r bolg’an ja’rdemge mu’ta’j isbilermenlik subyektlerinen 15 isbilermen menen jeke ushirasip, saliq to’lewshilerge ko’rsetiletug’in arnawli xizmetler dizimi menen tanistirilip, isbilermenlik subyektlerinin’ mashqalalari u’yrenilip shig’ildi.
U’yreniw na’tiyjesinde 15 saliq uyimlarina baylanisli bolg’an ma’seleler boyinsha mashqalalari bar ekenligi aniqlanip, tiyisli a’meliy ja’rdemler ko’rsetildi.
Sonnan 9 jag’dayda jan’adan jumisin jolg’a qoyip atirg’an isbilermenlerge birinshi buxgalteriyaliq esabatlarin ju’ritiwdi tu’sindiriw, 6 jag’dayda jeke esap betinen nusqa beriw ha’m basqa ma’seleler boyinsha mashqalalari sheship berildi.
Sonin’ menen birge, u’yreniwler dawaminda saliq tu’rleri boyinsha 2 subyektlerdin’ 2.1 million swm a’meldegi artiqsha to’legen summasi qaytarip berildi. Bu’gingi ku’nde saliq to’lewshilerge qolayliqlar jaratiw maqsetinde elektron xizmetler ko’rsetiw ko’lemin ja’ne de ken’eytiw za’ru’rli faktor bolip atir. Misali, bu’gingi ku’nde Qanliko’l rayoninda “E-ijara” avtomatlastirilg’an programmaliq da’stu’ri arqali isbilermenlerge tu’sindiriw ilajlari alip barilmaqta.
Haqiyqattan da, Prezidentimiz aytip o’tkenindey, saliq to’lewshilerge haqiyqiy ma’niste ja’rdemshi, u’yretiwshi boliw saliq sho’lkemlerinin’ bas waziypasina aylanip atir. Usi ma’nisten alip qarag’anda, isbilermenler ushin ja’ne de jen’illik jaratiw ushin “Avtokameral” avtomatlastirilg’an informaciya sistemasinin’ iske tu’siriliwi tarawdag’i jan’aliq boldi.
Bul sistema arqali, saliq sho’lkemleri saliq to’lewshiler iskerliginde tekseriwden alding’i analizlerdi, itibar qaratin’ tekseriwlerdi emes, analizlerdi o’tkeriwi mu’mkin. Yag’niy, saliq to’lewshi iskerligi dawaminda qanday da aljasiqlarg’a jol qoyip atirg’an bolsa yamasa esabatlarinda qanday da kemshilikler aniqlang’an jag‘dayda, avtomatlasqan sistema tezlik penen saliq to’lewshinin’ jeke kabinetine aljasiqlardi on’law haqqinda xabarnama jiberedi. Sapali programma o’zi kemshiliklerdi aniqlap, waqtinda isbilermenge ja’rdemshi bolip, xabar berip baradi. En’ a’hmiyetlisi, bunda insan faktori aralaspaydi.
Itibarli ta’replerden tag’i biri, saliq reformalarinin’ jedellik penen a’melge asiriliwi ha’m de saliq mexanizmlerinin’ ja’ne de a’piwayilasiwi na’tiyjesinde, jasirin ekonomika keskin qisqarip, saliq tu’simleri sezilerli da’rejede artpaqta. Isbilermenlik subyektlerine saliq nizamshilig’ina kiritilgen o’zgeris ha’m qosimshalar, jan’aliqlar, avtomatlastirilg’an informaciya sistemalari haqqinda u’zliksiz tu’rde, toliq mag’liwmatlar berip barilmaqta.
Hu’rmetli isbilermenler!
Qanliko’l rayoni Saliq xizmeti sho’lkemleri xizmetkerleri saliq tarawina tiyisli barliq sorawlarin’izg’a juwap beriw, bilmegenlerin’izdi u’yretiw ha’m “Saliqshi – isbilermenge ko’mekshi” principi tiykarinda sizge jaqinnan ja’rdem beriwge ba’rqulla tayin.
Qanliko’l rayoni saliq inspekсiyasi baslig’i orinbasari R.Nazarovtin’ isbilermenlerge esabati ha’m mu’rájati.
