Sociallıq tarmaqlardaǵı múrájat boyınsha
Sociallıq tarmaqlarda járiyalanǵan kárxananıń jumısı boyınsha Beruniy rayonı salıq inspekciyası tárepinen úyreniw jumısları alıp barıldı. Úyreniw nátiyjelerine bola rayondaǵı “Yagona Stroy Grup” shańaraqlıq kárxanası 2024-jıl 6-iyun sánesinde mámleketlik dizimnen ótkerilgen.
Búgingi kúnde kárxana aylanıstan alınatuǵın salıq tólewshisi esaplanadı.
Kárxana óz jumısın 2 jumısshı menen baslaǵan bolıp, máhállege biriktirilgen salıq inspektorları tárepinen alıp barılǵan túsindiriw jumıslarınan soń 12 xızmetkerdiń rásmiy sektorda bántligi támiyinlendi.
Sociallıq tarmaqlardaǵı videokóriniste kárxana basshısı óz ónimin sırt elge eksport etkenligi haqqında maǵlıwmat bergen. Sonıń menen birge, úyreniw dawamında salıq uyımınıń maǵlıwmatlar bazası maǵlıwmatları hám sırtqı sawda operaciyalarınıń birden-bir elektron málimleme sistemasındaǵı maǵlıwmatları tiykarınan kárxanada eksport ámeliyatın ámelge asırmaǵanlıǵı hám sırtqı sawda operaciyaları bolmaǵanlıǵı málim boldı.
Prezidentimiz tárepinen atap ótilgenindey, “Salıqshı – isbilermenge járdemshi” principi mámleketlik salıq xızmeti uyımlarınıń tiykarǵı jumıs baǵdarlarına aylandı. Salıq sistemasında eń dáslep, jumıs baslap atırǵan isbilermenge birinshi qádeminen oǵan qolaylı hám paydalı salıq rejimin tańlawda járdem beriw, keyin ala biznes subektiniń jumısın jáne de keńeytiwge, jumıs islemey atırǵanların tiklewge járdem beriw, buxgalteriyasın júrgiziw, esabatlardı toltırıw hám tapsırıw, qullası, ne mashqalası bolsa sheshiw boyınsha xızmet kórsetiwge tiykarǵı itibar qaratıladı. Sonday-aq, jumısımız qansha salıq nızamshılıǵınıń buzılıwı anıqlandı hám qosımsha salıq esaplandı, dep isbilermendi jazalawǵa qaratılmaydı, kerisinshe, salıq nızamshılıǵınıń buzılıwı qanshelli azayǵanı hám isbilermenlerdi artıqsha qárejetlerden saqlap qalıwǵa qansha úles qosılǵanı tiykarǵı jumıs ólshemine aylandı.