#ushırasıw
Qaraqalpaqstanlı salıqshılardıń jumıs nátiyjeliligi talqılandı
Qaraqalpaqstan Respublikası salıq basqarmasında Salıq komiteti baslıǵınıń orınbasarı Uluǵbek Sadullayev qatnasıwında jeke quram menen májilis ótkerildi.
Dáslep byudjet túsimlerin támiyinlew, atap aytqanda, 2025-jıldıń IV sheregin nátiyjeli juwmaqlaw máselesi dodalandı.
Hár bir salıq túri boyınsha belgilengen prognoz kórsetkishi hám onıń ámeldegi orınlanıwı birme-bir talqılandı.
“Kárxanabay” baǵdarında nátiyjelilik kórsetkishi tómen bolǵan taraw hám tarmaq juwapkerleri jáne “máhállebay” sistemasında eń tómen nátiyjelerdi kórsetip atırǵan salıq inspektorları sınǵa alındı.
Salıq tólewshiler tárepinen artıqsha tólengen yamasa artıqsha óndirilgen salıq tólemin qısqartıw, artıqsha tólemge jol qoyǵan salıq xızmetkerlerine belgilengen tártipte intizamıy jaza sharaları qollanılıwı boyınsha eskertildi.
Jasırın ekonomikanı qısqartıw, rásmiy emes jumısshı-xızmetkerlerdiń jumısın legallastırıw boyınsha jumıslardı nátiyjeli shólkemlestiriw lazımlıǵı atap ótildi.
Sonday-aq, ushırasıwda korrupciyaǵa qarsı gúresiw hám onıń aldın alıw máselesine ayrıqsha itibar qaratıldı. Korrupciyalıq jaǵdaylarǵa sebep bolıp atırǵan faktorlar hám olardı saplastırıw ilajları dodalandı. Atap aytqanda, ishki miynet tártip-qaǵıydalarına ámel etpew, jumıs nátiyjeliliginiń tómenlewi hám dámegóylik sıyaqlı ilettler barlıq huqıqbuzarlıqlardıń tiykarı ekeni atap ótildi. Ilaj juwmaǵında korrupciyanıń ayanıshlı aqıbetleri sáwlelengen videorolik qoyıp berildi.
Sonıń menen birge, jámáátte salamat ortalıqtı qáliplestiriw hám óz-ara birgelikte islesiw belgilengen prognoz rejesiniń orınlanıwın támiyinlew menen bir qatarda korrupciyalıq jaǵdaylardiń aldın alıwda da ayrıqsha áhmiyetke iye ekenligi atap ótildi.
