Assalawma aleykum,
Húrmetli salıq tólewshiler!
Xabarıńız bar, usı jıl 16-mart kúni Prezidentimiz Mámleketlik salıq komitetine barıp, salıq shólkemleri xızmetkerleri menen ushırasıw waqtında isbilermenler menen ushırasıp, olardıń máselelerin úyrenip, salıq nızamshılıǵındaǵı ózgerisler boyınsha túsindiriwler alıp barıp, zárúr tapsırmalar bergen edi.
Búgingi kúnde de “Salıqshı – isbilermenge járdemshi” principi tiykarında Qanlikól rayonı salıq xızmeti shólkemleri tárepinen isbilermenler aldına barǵan halda olardıń máselelerin úyrenip, kóshpeli salıq másláhátları kórsetilip atır.
Mámleketlik salıq komitetiniń 2021-jıl 11-yanvar kúngi “Salıqshı-isbilermenge kómekshi” principi tiykarında isbilermenlerdi qollap-quwatlaw boyınsha ámelge asırılıwı lazım bolǵan “Háreketler rejesi”n tastıyıqlaw haqqındaǵı 10-sanlı buyrıǵı qabıl etildi.
Usı buyrıqqa tiykarlanıp kómeklesiw zárúr bolǵan isbilermenlik subektleriniń dizimi islep shıǵılıp, bul toparǵa:
– tazadan ashılǵan subektler;
– esabat usınbaǵanlar;
– “Nol” esabat usınǵanlar;
– tólem ámelge asırmaǵanlar;
– is haqı esaplamaǵanlar;
– bank aylanısın ámelge asırmaǵanlar;
– salıq uyımlarına bir neshe márte múráját etken salıq tólewshiler kiritildi.
Usı kómekke zárúr bolǵan toparǵa kiritilgen isbilermenlik subektleriniń mashqalaların úyreniw hámde olarǵa járdem beriw barısında salıq organları tárepinen tiyisli ilajlar alıp barılmaqta.
Atap aytqanda, Qanlıkól rayonlıq Mámleketlik salıq inspekciyası tárepinen 2022-jıldıń aprel’ ayı dauamında 13 isbilermenler menen ushırasıwlar ótkerdik hám kómeklesiw zárúr bolǵan járdemge mútáj isbilermenlik subektlerinen 9 isbilermen menen jeke ushırasıp, salıq tólewshilerge kórsetiletuǵın arnawlı xızmetler dizimi menen tanıstırılıp, isbilermenlik subektleriniń mashqalaları úyrenilip shıǵıldı.
Uyreniw nátiyjesinde 6 salıq uyımlarına baylanıslı bolǵan máseleler boyınsha mashqalaları bar ekenligi anıqlanıp, tiyisli ámeliy járdemler kórsetildi.
Sonnan 2 jaǵdayda jańadan jumısın jolǵa qoyıp atırǵan isbilermenlerge birinshi buxgalteriyalıq esabatların júritiwdi túsindiriw, 2 jaǵdayda jeke esap betinen nusqa beriw hám 2 jaǵdayda basqa máseleler boyınsha mashqalaları sheship berildi.
Sonıń menen birge, birge úyreniwler dawamında salıq túrleri boyınsha 6 subektlerdiń 5.5 million sўm ámeldegi artıqsha tólegen summası qaytarıp berildi. Búgingi kúnde salıq tólewshilerge qolaylıqlar jaratıw maqsetinde elektron xızmetler kórsetiw kóleminiń jáne de keńeytiw zárúrli faktor bolıp atır. Mısalı, búgingi kúnde Qanlıkól rayonında “E-ijara” avtomatlastırılǵan programmalıq dastúri arqalı isbilermenlerge túsindiriw ilajları alıp barılmaqta.
Haqıyqattan da, Prezidentimiz aytıp ótkenindey, salıq tólewshilerge haqıyqıy mániste járdemshi, úyretiwshi bolıw salıq shólkemleriniń bas wazıypasına aylanıp atır. Usı mánisten alıp qaraǵanda, isbilermenler ushın jáne de jeńillik jaratıw ushın “Avtokameral” avtomatlastırılǵan informaciya sistemasınıń jumısqa túsiriliwi tarawdaǵı jańalıq boldı.
Bul sistema arqalı, salıq shólkemleri salıq tólewshiler iskerliginde tekseriwden aldınǵı analizlerdi, itibar qaratıń tekseriwlerdi emes, analizlerdi ótkeriwi múmkin. Yaǵnıy, salıq tólewshi iskerligi dawamında qanday da aljasıqlarǵa jol qoyıp atırǵan bolsa yamasa esabatlarında qanday da kemshilikler anıqlanǵan jaǵdayda, avtomatlasqan sistema tezlik penen salıq tólewshiniń jeke kabinetine aljasıqlardı ońlaw haqqında xabarnama jiberedi. Sanalı programma ózi kemshiliklerdi anıqlap, waqtında isbilermenge járdemshi bolıp, xabar berip baradı. Eń áhmiyetlisi, bunda insan faktorı aralaspaydı.
Usı jıldıń 4 ayı dawamında “Soliq hamkor” programması arqalı Qanlıkól rayonında iskerlik kórsetip kiyatırǵan isbilermenlik subektleri menen baylanıslı salıq huqıqbuzarlıqları haqqında jámi 15 múráját kelip túsken. Olardıń 15 múrájátı boyınsha kóshpeli salıq tekseriwleri ótkerilip, sawda qaǵıydaları buzılǵanlıǵı tastıyıqlandı. Búgingi kúnge shekem múrájátları óz tastıyıǵın tapqan 10 puqaranıń bank plastik kartasına 5 million sўmǵa jaqın pul ótkerip berildi.
Itibarlı táreplerden taǵı biri, salıq reformalarınıń jedellik penen ámelge asırılıwı hám de salıq mexanizmleriniń jáne de ápiwayılasıwı nátiyjesinde, jasırın ekonomika keskin qısqarıp, salıq túsimleri sezilerli dárejede artpaqta. Isbilermenlik subektlerine salıq nızamshılıǵına kiritilgen ózgeris hám qosımshalar, jańalıqlar, avtomatlastırılǵan informaciya sistemaları haqqında úzliksiz túrde, tolıq maǵlıwmatlar berip barılmaqta.
Húrmetli isbilermenler!
Qanlıkól rayonı mámleket salıq xızmetı shólkemleri xızmetkerleri salıq tarawına tiyisli barlıq sorawlarıńızǵa juwap beriw, bilmegenlerińizdi úyretiw hám “Salıqshı – isbilermenge kómekshi” principi tiykarında sizge jaqınnan járdem beriwge bárqulla tayın.