Húrmetli salıq tólewshiler!
Xabarıńız bar, usi jıl 16-mart kúni Prezidentimiz Mámleketlik salıq komitetine barıp, salıq shólkemleri xızmetkerleri menen ushırasıw waqtında isbilermenler menen ushırasıp, olardıń máselelerin úyrenip, salıq nızamshılıg‘ındag‘ı ózgerisler boyınsha túsindiriwler alıp barıp, zárúr tapsırmalar bergen edi.
Búgingi kúnde de “Salıqshı – isbilermenge járdemshi” principi tiykarında Taxtakópir rayonı mámleketlik salıq inspekciyası tárepinen isbilermenler aldına barǵan halda olardıń máselelerin úyrenip, kóshpeli salıq másláhatları kórsetilip atır.
Mısal retinde Taxtakópir rayonında usı jıldıń 5 ayı dawamında 148 kárxanalardıń máseleleri tolıq úyrenildi. Nátiyjede, salıq xızmeti shólkemleri xızmetkerleri járdemi menen 148 máseleler unamlı sheshildi. Búgingi kúnde basqa shólkemler menen baylanıslı máseleler qatań qadaǵalawǵa alınıp, sheriklikte sheshiw ilajları kórilmekte.
Sonıń menen birge, úyreniwler dawamında salıq túrleri boyınsha 27 subyektlerdiń 37,8 million som ámeldegi artıqsha tólegen summası qaytarıp berildi. Atap ótiw orınlı, búgingi kúnde salıq tólewshilerge qolaylıqlar jaratıw maqsetinde elektron xızmetler kórsetiw kólemin jáne de keńeytiw zárúrli faktor bolıp atır. Mısalı, búgingi kúnde Taxtakópir rayonında “E-ijara” avtomatlastırılg‘an programmalıq da’sturi arqalı isbilermenlerge túsindiriw ilajları alıp barılmaqta.
Haqıyqattan da, Prezidentimiz aytıp ótkenindey, salıq tólewshilerge haqıyqıy mániste járdemshi, úyretiwshi bolıw salıq shólkemleriniń bas wazıypasına aylanıp atır. Usı mánisten alıp qaraǵanda, isbilermenler ushın jáne de jeńillik jaratıw ushın “Avtokameral” avtomatlastırılǵan informaciya sistemasınıń jumısqa túsiriliwi tarawdaǵı jańalıq boldı.
Bul sistema arqalı, salıq shólkemleri salıq tólewshiler iskerliginde tekseriwden aldınǵı analizlerdi, itibar qaratıń tekseriwlerdi emes, analizlerdi ótkeriwi múmkin. Yaǵnıy, salıq tólewshi iskerligi dawamında qanday da aljasıqlarǵa jol qoyıp atırǵan bolsa yamasa esabatlarında qanday da kemshilikler anıqlanǵan jaǵdayda, avtomatlasqan sistema tezlik penen salıq tólewshiniń jeke kabinetine aljasıqlardı ońlaw haqqında xabarnama jiberedi. Sanalı programma ózi kemshiliklerdi anıqlap, waqtında isbilermenge járdemshi bolıp, xabar berip baradı. Eń áhmiyetlisi, bunda insan faktorı aralaspaydı.
Itibarlı táreplerden taǵı biri, salıq reformalarınıń jedellik menen ámelge asırılıwı hám de salıq mexanizmleriniń jáne de ápiwayılasıwı nátiyjesinde, jasırın ekonomika keskin qısqarıp, salıq túsimleri sezilerli dárejede artpaqta. Isbilermenlik subyektlerine salıq nızamshılıǵına kiritilgen ózgeris hám qosımshalar, jańalıqlar, avtomatlastırılǵan informaciya sistemaları haqqında úzliksiz túrde, tolıq maǵlıwmatlar berip barılmaqta.
Usı jıldıń I sheregi dawamında “Soliq hamkor” programması arqalı Taxtakópir rayonında iskerlik kórsetip kiyatırǵan isbilermenlik subyektleri menen baylanıslı salıq huqıqbuzarlıqları haqqında jámi 17 múrájat kelip túsken bolıp, sonnan 1 múrájat túrli sebeplerge baylanıslı biykar etilgen. Olardıń 16 múrájatı boyınsha kóshpeli salıq tekseriwleri ótkerilip, sawda qaǵıydaları buzılǵanlıǵı tastıyıqlandı. Búgingi kunge shekem múrájatları óz tastıyıǵın tapqan 12 puqaranıń bank plastik kartasına 6,0 million somǵa jaqın pul ótkerip berildi.
Húrmetli isbilermenler!
Taxtakópir rayonı mámleketlik salıq inspekciyası xızmetkerleri salıq tarawına tiyisli barlıq sorawlarıńızǵa juwap beriw, bilmegenlerińizdi úyretiw hám “Salıqshı – isbilermenge kómekshi” principi tiykarında sizge jaqınnan járdem beriwge barqulla tayın.