#ushırasıw
Taqıyatas rayonında 360 tan aslam kishi hám orta isbilermenlik subyektleri jumıs alıp barmaqta
Kishi hám orta biznes hár qanday mámlekettiń ekonomikalıq rawajlanıwında áhmiyetli orın iyeleydi. Búgingi kúnde elimizde ekonomika kóleminiń yarımınan kóbi, sanaat hám eksporttıń úshten bir bólegi áyne kishi hám orta biznes wákilleriniń úlesine tuwrı kelmekte.
Bul baǵdarda jumıs alıp barıp atırǵan isbilermenlerdiń qatarın jáne de keńeytiw, óz potencialın tolıq iske qosıwı ushın zárúr shárayatlar jaratıw maqsetinde respublikamız boylap kishi hám orta biznes wákillerinıń qatnasıwında ashıqtan-ashıq sáwbetlesiwler ótkerilmekte.
Qaraqalpaqstan Respublikası salıq basqarması baslıǵı Xalmurza Bekchanovtıń taqıyataslı isbilermenler menen ushırasıwında da jeke menshik sektor wákillerine berilip atırǵan imkaniyatlar, bar mashqalalar haqqında pikir almastı.
Qatnasıwshılarǵa Ózbekstan Respublikası Prezidentiniń “Kishi hám orta biznestiń ekonomikadaǵı ornın arttırıw ilajları haqqında”ǵı pármanına muwapıq berilip atırǵan imkaniyatlar haqqında tolıq maǵlıwmatlar berildi.
Sonday-aq, isbilermenlerdiń salıq jeńilliklerinen paydalanıw, salıq esabatları, hákimshilik huqıqbuzarlıq, kredit hám salıq stavkaları menen baylanıslı mashqala hám usınısları tıńlanıp, unamlı sheshiw ilajları kórildi.
