Такси айдаў менен шуғылланатуғын физикалық тәреплер қандай салықлар төлейди?

Такси айдаў менен шуғылланатуғын жеке тәртиптеги исбилерменлер (ЖТИ) республиканың қайсы аймағында жумысын әмелге асырыўына қарамастан,  2021-жыл ушын ҳәр айлық 150 мың сум қатаң ҳәм белгиленген муғдардағы социаллық салықты (245 мың сум) төлейди. Бул ҳаққында Мәмлекетлик салық комитети баспасөз хаткери  Музаффар Назаров мәлим етти, деп хабар береди gazeta.uz.

Сондай-ақ, берилген лицензия бети бойынша бир жылға  245 мың сум муғдарында  мәмлекетлик бажы өндирилетуғыны атап өтилди.

Бунда  2021-жылы 1-сентябрьге шекем ЖТИ сыпатында мәмлекетлик дизимнен өткенлер ушын мәмлекетлик бажы өндирилмейди.

Еслетип өтемиз, эксперимент  түринде жеке тәртиптеги исбилерменлерге 4 орынлық жеңил автотранспортта жолаўшы тасыў жумысы менен шуғылланыў ҳуқықы берилип атырғаны ҳаққында хабар берген едик. 2021-жыл 1-сентябрьден баслап ЖТИ сыпатында такси айдаў жумысы менен шуғылланыў тек ғана қарыйдарды излеў бойынша интерактив хызмет көрсетиўши компаниялар (агрегаторлар) хызмети арқалы әмелге асырылады.

Жеке тәртиптеги исбилерменлерге такси айдаў жумысы менен шуғылланыў ушын басланғыш төлем 5 есеге азайтылып,  690 мың сумды, айлық төлем 1,5 есеге азайып 425 мың сумды қурайды.