ijara.soliq.uz test режиминде иске түсти

Ѳзбекстан Республикасы Президентиниң 2018-жыл 25-майдағы қарарына тийкар 2019-жыл 1-январдан баслап ижәра шәртнамарын салық органларында мәжбүрий есапқа алыў тәртиби орнатылды ҳәм көшпес мүлкти ижәраға бериў шәртнамаларын мәжбүрий нотариаллық тастыйықлаў талабы бийкар етилди.

Усыған тийкар, Мәмлекетлик салық комитетиниң қарарына муўапық «Көшпес мүлк ижәра шәртнамаларын мәмлекетлик салық  хызмети органларында мәжбүрий есапқа алыў тәртиби» ислеп шығылды.

Усы тәртипке тийкар, көшпес мүлк ижәра шәртнамаларын салық органларында есапқа алыўдың әпиўайы системасы жаратылды.

Ижәраға бериўши ҳәм ижәраға алыўшы ортасында еки тәреплеме шәртнама  дүзилиўи ҳәм ол салық органларында есапқа қойылыўы лазым.

Шәртнаманы есапқа алыў ушын салық органлары тәрепинен ҳеш қандай ҳақы алынбайды

Есапқа алыў еки усылда әмелге асырылатуғын еди:

Мәмлекетлик салық комитиниң my.soliq.uz электрон салық хызметлери порталындағы салық төлеўшиниң жеке кабинетине жайластырылған «Ижәра шәртнамаларын есапқа алыў» интерактив хызмети арқалы ямаса физикалық шахстың турақлы жасаў, юридикалық шахстың мәмлекетлик дизимнен өткен жериндеги салық инспекциясына барған ҳалда

Яғный, 2019-жыл 1-январдан баслап пуқараларға ҳәм исбилерменлик суъбектлерине қолайлық жарытыў мақсетинде Мәмлекетлик салық комитети my.soliq.uz порталында «Ижәра шәртнамаларын есапқа алыў» интерактив хызмети енгизилген ҳәм бул хызметтен күни-түн пайдаланыў имканияты жаратылған еди.

Бүгинги күнде үшинши усылы да енгизилмекте. Салық системасы ҳәкимшилигин жәнеде ашық ҳәм инсан факторының араласыўын еледе қысқартыў мақсетинде көшпес мүлк ижәра шәртнамаларын мәмлекетлик салық хызмети органларында есапқа  алыў бойынша–e-ijara дәстүрий өними(программа) жаратылды.

Ижәраға бериўши ҳәм алыўшылар ушын жаратылып атырған усы хызмет ijara.soliq.uz интернет мәнзилинде тест режиминде жайластырылды.

Тек ijara.soliq.uz интернет мәнзилине электрон номерли имза арқалы кириледи.

Бул жерде ижәраға бериўши, ижәраға алыўшы ҳәм ижәраға берилип атырған көшпес мүлк ҳаққында мағлыўматлар толығы менен жайластырылады. Қалаберсе, көшпес мүлктиң ижәра шәртнамаларын есапқа алыўды тастыйықлағанын ямаса бийкарланғанында билиў мүмкин. Мағлыўматлар ҳақыйқыйлығын арнаўлы QR-кодын мобил телефонда сканерлеў арқалы анықлаў мүмкин.

Мағлыўматлар тастыйықланған жағдайда көшпес мүлк ижәра шартнамасы Мәмлекетлик салық хызмети органларында есапқа алынғанлығы ҳаққында Гуўалық қәлиплеседи.

Гуўалықта есапқа алынған сәне, оның арнаўлы (ID) тәртип номери ҳәм электрон номерли имза ҳаққында қосымша мағлыўматлар бар.

Буннан тысқары, Электрон номерли имза арқалы тастыйықланған ҳәр бир ҳәрекет Ҳүжжет тарийхы бөлиминде малыўмат ретинде қәлиплесип барады.

 

Қарақалпакстан Республикасы мәмлекетлик салык басқармасы Жәмийетшилик пенен байланыслар ҳәм хуқуқый мәлимлеме секторы