Nókis qalası mámleketlik salıq inspekciyasınıń Isbilermenlikti qollap-quwatlaw sektorı tárepinen aymaqtaǵı isbilermenlik subyektlerin qollap-quwatlaw, jumısları dawamında ushırasıp atırǵan mashqalalarına sheshim tabıw, kredit, jer hám salıq esabatların tapsırıwda ámeliy járdemler kórsetilmekte.
Atap aytqanda, Ózbekstan Respublikası Prezidentiniń «Kóshpeli sawda jumısına málimleme texnologiyaların engiziw hám sawda avtomatı arqalı usaqlap satıw sawdası menen shuǵıllanıwshı isbilermenlik subyektlerin qollap-quwatlaw ilajları haqqında»ǵı PQ-5136-sanlı qararı qabıl etildi.
Bul qarardıń mazmunı hám áhmiyetin isbilermenlik subyektlerine jetkeriw maqsetinde taraw qánigeleri tárepinen túsindiriw jumısları ámelge asırılmaqta.
Qarar menen 2021-jıl 1-dekabrden baslap:
kóshpeli sawda isbilermenler tárepinen kóshpeli sawda obyektlerin elektron tárizde «K–SAVDO» avtomatlastırılǵan málimleme sistemasında dizimnen ótkeriw jolı menen ámelge asırıladı. Bunda, dizimnen ótkeriw ushın jıyın óndirilmeydi;
kóshpeli sawda ornı (jeke múlkdarlarǵa tiyisli orınlardan tısqarı) kóshpeli sawda obyektleri jaylasıw sxemaları boyınsha «K–SAVDO» AAT arqalı elektron aukcionda satıladı.
Aukcion baslanıw bahası tiyisli rayon (qala)daǵı jer uchastkasınıń jer salıǵı muǵdarında belgilenedi.
Aukcion jeńimpazı tárepinen kóshpeli sawda ornı bahası tolıq tólengennen soń oǵan «K–SAVDO» sisteması arqalı avtomatikalıq ráwishte QR-kod qoyılǵan gúwalıq beriledi hám ol bul orınnan 36 ay múddetke paydalanıw huqıqına iye boladı. Bunda kóshpeli sawda ornınan paydalanıw boyınsha shártnama dúziw talap etilmeydi.
Qararǵa tiykar sawda avtomatları arqalı tovarlardı satıw hám (yamasa) xızmetlerdi kórsetiw jumısı menen shuǵıllanıwshı isbilermenlik subyektlerin jáne de qollap-quwatlaw maqsetinde:
sawda avtomatlarına qadaǵalaw-kassa texnikalarınan májbúriy paydalanıw talabı qollanılmaslıǵı;
satatuǵın tovarları hám (yamasa) kórsetetuǵın xızmetleri túrine qaramastan bunday jumıs penen shuǵıllanıwshı yuridikalıq shaxslar usaqlap satıw tarawındaǵı salıq tólewshi dep bep júritiliwi belgilendi.
Esletpe: kóshpeli sawda obyektleri–waqtınshalıq tiykarda jaylastırılǵan hám máwsimlik belgilerge iye bolǵan, sonday-aq, jumıs kúni juwmaqlanǵannan soń obyektti kóshiriw imkanı bolǵan kóshpeli sawda obyektleri (lotoklar, plakatlar, sawda arbaları, avtodúkánlar, avtotirkemeler, avtocisternalar, fudtraktlar, tonarlar, sawda avtomatları). Obyektti kóshiriw talabı sawda avtomatlarına qollanılmaydı.
Qaraqalpaqstan Respublikası mámleketlik salıq basqarması Málimleme xızmeti