Ózbekstan Respublikası Prezidentiniń 2022 jıl 29 yanvar kúngi “Mámleketlik uyımlar menen múnásibetlerde puqaralar hám isbilermenlik subyektleri huqıqlarınıń nátiyjeli qorǵalıwın támiyinlew hám xalıqtıń sudlarǵa bolǵan isenimin jáne de arttırıw ilajları haqqında”ǵı PQ-107-sanlı Qararınıń 5-bánti birinshi xatbasında Joqarǵı sud hám Sudyalar joqarǵı keńesi tárepinen mápdar ministrlik hám uyımlar menen birgelikte puqaralar hám isbilermenlik subyektlerin, sonday-aq, mámleketlik hákimiyat hám basqarıw uyımları, jergilikli atqarıw hákimiyatı uyımları xızmetkerlerin hákimshilik sudlar iskerligi hám olardıń jámiyette nızamlılıqtı támiyinlewdegi roli menen tolıq tanıstırılıwın támiyinlew belgilengen.
Atap ótilgen Qarar talapların orınlaw maqsetinde Ózbekstan Respublikası Joqarǵı sudı hǝm Sudyalar joqarǵı keńesi tǝrepinen islep shıǵılǵan “Jol kartası”na muwapıq Sudyalar joqarǵı keńesi tárepinen “Mámleketlik salıq xızmeti uyımları xızmetkerlerin hákimshilik sudlar iskerligi hám olardıń jǝmiyette nızamlılıqtı támiyinlewdegi roli, salıqqa baylanıslı hákimshilik islerdi kórip shıǵıw boyınsha sud ámeliyatı haqqında”ǵı temada seminar-treningler ótkeriliwi rejelestirilgen edi.
Usıǵan baylanıslı, Qaraqalpaqstan Respublikası hákimshilik sudı imáratında onlayn tárizde bolıp ótken seminar-treningte Qaraqalpaqstan Respublikası basqarma hám rayon, qala mámleketlik salıq inspekciyasınıń salıq tekseriwlerin júritiw hám salıq esaplap, óndiriw menen baylanıslı wazıypalar júkletilgen xızmetkerleri qatnastı.
Seminar treningde Ózbekstan Respublikası joqarǵı sudı sudyaları hám Sudyalar joqarǵı mektebi oqıtıwshıları tárepinen “Hákimshilik atqarıw uyımları qararları hám háreketleri (háreketsizligi) júzesinen dawlardı sudta kóriw ámeliyatı”, “Hákimshilik sudlar iskerligi hám olardıń jámiyette nızamlılıqtı támiyinlewdegi roli”, “Salıq uyımları qararları, háreketleri ústinen hákimshilik sudqa shaǵım etiwdiń ózine tán qásiyetleri haqqında”ǵı bayanatlar tıńlandı.
Seminar-trening sońında qatnasıwshılardıń qızıqtırǵan sorawlarına juwaplar berildi.
B.Sultamuratov,
Qaraqalpaqstan Respublikası mámleketlik salıq basqarması bólim baslıǵı.