#ıssıxana_jumısı
Íssıxana xojalıqlarınıń mashqalaları hám usınısları úyrenildi
📍Salıq komiteti baslıǵınıń orınbasarı Uluǵbek Sadullayev qatnasıwında Nókis qalası hám barlıq rayonlarda ıssıxana jumısı menen shuǵıllanıwshı isbilermenler menen ótkerilgen sóylesiwde isbilermenler tárepinen bildirilgen mashqala hám usınıslar tıńlandı.
⚡️Ushırasıwda Salıq komiteti baslıǵınıń orınbasarı isbilermenler ushın belgilep berilgen jeńillikler hám imkaniyatlar haqqında, sonıń ishinde, salıq qarızın tólew múddetin 2028-jıldıń aqırına shekem keshiktiriw, 2025-jıl 1-oktyabr jaǵdayına esaplanǵan penya, finanslıq hám hákimshilik járiymalardı esapqa alıw, 2028-jıldıń aqırına shekem dáramatı 60 procentten artsa, sociallıq salıq stavkasın 12 procentten 1 procentke túsiriw, jer fondı kategoriyasına qaramastan awıl xojalıǵına mólsherlengen jerler ushın salıq stavkaların qollanıw boyınsha tolıq túsinik berdi.
Maǵlıwmat ornında, búgingi kúnde Qaraqalpaqstan Respublikasında jámi 75 isbilermenlik subyekti 169,1 gektar jer maydanında ıssıxana jumısı menen shuǵıllanbaqta. Isbilermenler tárepinen qurılǵan ıssıxanalarda 2025-jıldıń aqırına shekem 7 mıń tonnadan aslam, bul isbilermenler tárepinen 2026-jıl dawamında 10 mıń tonnadan aslam awıl xojalıǵı ónimleri, sonıń ishinde, 5 915 tonna pomidor, 2 151 tonna qıyar, 1 075 tonna limon hám 1 613 tonna basqa da ovoshlar jetistiriw rejelestirilgen.
Ushırasıw dawamında isbilermenler tárepinen ortaǵa taslanǵan ayırım mashqalalı máseleler ornında sheshildi, ayırımları boyınsha juwapkerlerge tapsırmalar berilip, orınlanıwı qatań qadaǵalawǵa alındı.
